الحمد لله والصلاة والسلام على رسول الله
أنا متين ، لازم أنحف.
كل سمستر أقول الكلام دا وما بسوي شيء ، في بداية السمستر أكون نشيط ، تاني أسبوع أبدأ أسوي جدول تمارين للسمستر الجاي (سيفون ع السمستر الحالي) ، بكل بساطة عشان إلين دحين ما لقيت حاجة تحفزني عشان أنحف ، كان في مشروع خطوبة وأتلحفت -عشان كان برد *فيس يمد لسانه*- ، مجتمعي إللي عايش فيه كله تماسيح ، عشان كده التسويف ماسك معايا كل سمستر بأسحب ومن دا الكلام.
بس لو جيت وفكرت فيها من ناحية تانية ، العقل السليم في الجسم السليم ، بجسمي دا وعقلي الحمد لله كويس ، يعني لمن أنحف وأحسن جسمي إن شاء الله عقلي حيكون أكوس من دحين إن شاء الله ، هذي حاجة حلوة والواحد يطمحلها.
ناحية تانية برضو ، جسمي هذا أمانة عندي ، حأنسأل عنو يوم القيامة ، الوزن الزايد يسبب أمراض ، بيدي إنني أنحف ، الحمد لله صحتي كويسة (أقدر أمشي وأتمرن) ، مافي أي حاجة تمنعني من النحف إلا النفسية ، هل هذا حيكون عذري؟ لازم أشتغل على نفسي.
مافي حاجة سهلة ، وفي نفس الوقت مافي حاجة صعبة ، الموضوع يبغاله إرادة وتخطيط ، التخطيط أنا بارع فيه لكن الإرادة تنقصني.
إن شاء الله في الصيف حتكون بدايتي في مشروع النحف.
بس خلاص
هذا وصلى الله على نبينا محمد وعلى آله وصحبه وسلم
